***

Tanrım,məni işığınla aydınlat,

Qara rəngə bürüməyim sübhümü.

Öz- özümlə bu savaşda yenilim,

Məğlub etsin hərbim hər gün sülhümü.

Aldanmasın hər barışa qoy başım,

Yaman dardır ruha bədən- bu çuxam.

Mən eləyir məni mənlə savaşım,

Öz-özümlə barışdığım gün yoxam.

Həyat savaş,həyat vuruş meydanı,

Bu meydanda bəxtin valı dönəcək.

Mən o mənə qalib gəlsəm, bilirəm

Gələcəyin gələcəyi sönəcək.

                   ***

Yolçuyam yoluma yarımadımsa,

Sağıma, soluma yarımadımsa.

Bircə sağoluna yarımadımsa,

Daha bu dünyada kiməm, kim üçün?

Çıraqtək dörd yana nur saçmadımsa,

Məkrli gecəyə sirr açmadımsa.

Dözüb kölə oldum, hürr qaçmadımsa,

Daha bu dünyada kiməm kim üçün?

Özüm öz özümə enmədimsə heç,

Haqqım yeyiləndə dinmədimsə heç,

Nahaqqı doğmamış gömmədimsə heç,

Daha bu dünyada kiməm, kim üçün?

Əliyəm, Vəliyəm, dəliyəm adam,

Mən eşqə, sevgiyə zəliyəm, adam!

Bilmirəmsə bu gün mən nəyəm adam,

Daha bu dünyada kiməm kim üçün?

Gəl şəkil çəkdirək

Örtək gülüşümüzlə acılarımızın üstünü.

Şəkillərdə,bəlkə də,xoşbəxt olur ancaq insan.

Yaxın dur,

Gülümsə

Mənə acıqlı da olsan.

Bu saxta həyat,

Onsuz da ağrılı şəkillərlə doldurub qəlbimizi.

Biz şəklimizi

Gülə- gülə çəkdirək

Adını qoyaq Sevda şəkli.

Sevənlər baxıb öyrənsin,

Ağlayanda gülməyi

Yıxılanda qalxmağı.

Gəl şəkil çəkdirək

Sən qız,mən oğlan uşağı.

Axsın qarın qanı isti nəfəsimizdə.

Pozulsun həyatın sərhədləri,

Şəkil çərçivəmizdə...

Zülmət gecədə

Bir ulduz bəs edir işığını tutub gedim.

Tənhalığın baş gicəlləndirici dəhşətində

Kölgəmi görmək kifayətdir

Özümü xoşbəxt hiss edim.

Bu dünya aşiqlərin həsrət meydanıdır,

Bu həsrətdə sınanır- eşq!

Bu dəhşətdə tanınır - aşiq!

Ömrün Kərbəlasından keçmək

Hər zəvvara nəsib olmur.

Gələndən pıçıldadı qulağıma adımı atam!

Adam

Adam,

Adam!

Varsansa sabahın elə nur da saça bilər,

Üzündən eldən işıq da qaça bilər.

Əməlini qapı əllərinə açar elə.

Lap uşaqlıqdan belə söylədi atam,belə.

Bu düsturla hesablayıram qaranlıöın dərinliyini,

Günün işıq sürətini.

Yaşayıramsa özüm bilməliyım ki,

Dünya da bilsin qiymətimi.

Ən qatı gecədə işığı görə bilirəm,

Tənhalığı dilləndirirəm

Kölgəmlə danışıram özümü tapmayanda da.

Mənə məndən başqa

Heç kim qalib gələ bilməz bu dünyada,o dünyada.