olur ki, ümid ürəkdən

bir damar kimi qırılır;

bir an sənə elə gəlir

dırnağın ətdən ayrılır.

və bu zaman canda ağrı:

"damarım vuruldu, yoxsa..."

"a qolum, asıl boynumdan,

ayağım, indi ha axsa..."

sanki biri hər qismətdən

qoparıb bir tikə, gedir;

düşüb kiminsə ardına--

arxasıyca kölgə gedir...

quruluqdan çıxar belə-

gözün üzünü suvarsın...

kimsə tamam quruyacaq,

əgər üzündə su varsa...

hey ələyir işlərini,

ağlın bir ələkdi, bilsən.

gözün üstə nə saxlasan,

üstündə bir yükdü, bilsən...

duyğulansan, zənn eləmə

göz yaşı adicə sudu.

nə görürsən gördüyünün

bəlkə də çoxu

yuxudu...

Tanrı deyir: mən ki sənə

yaxınam şah damarından.

ağ gözündə də qaraya

bir simsarlıq vardır, inan...

yolun daşı yol yoldaşın,

sanki bir çiçək qədər

tər;

ağrıtmaq yox, bəlkə dəyib

ayağını öpmək istər?..

ay şər əməldən qaçağım,

yapmaq üçün nəsə yoğur...

qoy kimliyin çıxsın üzə;

sən hərdən özünə baş vur..