Göydən əcəl yağır, dalda yerim yox

"Göz yaşı" yalandı, "bəxt"...yoxdu, gözəl.

Dibsiz quyuların dibini göstər

Sevib-sevilməyə vaxt yoxdu, gözəl.

"Ah, Uf" yeri deyil, söz yeri deyil,

Toqquşaq-ayrılaq bir cüt badətək

İçimdə sərsəri küləklər əsir

Səni də, məni də aparır külək.

Ömür-göz qırpımı, göz qırpımında

Göz-gözə baxmağa vaxt yoxdu, gözəl.

"Sevirəm" söyləmə söz qırpımında

Xaraba sarayda taxt yoxdu, gözəl.

Dünyanln yaddaşı=güzgü yaddaşı

Hər kimsən...adın da yadımdan çıxıb.

Səni qoxlayaram başdaşınacan

Bir sinə daşının üstünə yıxıb.

Kişisiz, fəsilsiz bir dövran gəlir

Daha gəlinlər də hamilə olmaz.

Sinəmi açıram...oddu tökülür

Sonra heç külüm də əlinə gəlməz.

Göydən əcəl yağır, dalda yerim yox

Göz yaşı yalandı, bəxt yoxdu, gözəl.

Dibsiz quyuların dibini göstər

Sevib-sevilməyə vaxt yoxdu, gözəl.

(1990)