Mənə bir nağıl söylə,

Kirpiklərimə sığal çəksin şirinliyi.

Ruhumu oxşasın,

Bahar mehi kimi

sərinliyi.

Zülm yuvaları olmasın,

Gözlər qan-yaşla dolmasın.

Mənə bir nağıl söylə,

Göydən çox alma düşsün-

Ulduzların sayınca,

Hərə pay da götürsün

Öz evinə doyunca.

Mənə bir nağıl söylə,

Zülmət nura boyansın.

Hər kəs bal yuxusundan,

Sevinclərlə oyansın.

Cığırlar yola dönsün,

Həsrətlər birləşərək

Boyunda qola dönsün.

Mənə bir nağıl söylə,

Arzu çin olsun orda,

Hər kəs salam söyləsin

Yol göstərən

boz qurda.

Mənə bir nağıl söylə,

Ulduzların içində

Aydan bir yuvam olsun.

Üzü fərəhdən gülən,

Şen elim,obam olsun!

Qırxıncı otaqdayam,

Əlimdə qırx açar var.

Nağıllardan gəlmişəm,

Yel qanadlı çapar var.

Ömrüm də bir nağıldı,

Nağıla qulaq asdım

Yuxum qaçdı,dağıldı...