Bu gün Yenises.az-ın Dəyərli DOSTU, İZLƏYİCİSİ  və Ustad  ŞAİRİMİZb  Şakir  bəyin  Doğum günüdür! Onu ürəkdən  təbrik edir,  Can sağlığı  və Yeni Yaradıcılıq  UĞURLARI  diləyirik! Sükanı belə  saxlayın, Əzizimiz Şakir  bəy!!!

***

mən hər şeydə bir heç, sən, sən azda da çoxsan,

gör, duruca suyu bol gözümü bulaq san...

ey haqq olan Tanrı, haqq olanı kim sevir,

bir yaxınlıq göstər də mənə çox uzaqdan...

nə imişsən- göydə yer, ya yerdə kəhkəşan,

rəhmətinlə kömək ol, bir canda gücə dön.

göz yumursan keçir vaxt, göz açıb gördüyün

çox işlərə gəzdir əl, həyata ver də yön...

bir ulduzdan alıb nur günəşə hör çələng,

ey mən, düşün, düşün bir səmaya et diqqət;

eşq böyükdür, onu hey önəmsə, əzizlə,

bil yaxıcı oddu, od sönsə də, məhəbbət...

hə də, sözlə baş-başa qalanda ucasan,

gəl bir rəyə, fikir ki, qəlbində daim var...

üz verəsi olsan, bax, qəmlərə, yorulub

düşərsən ha, anla bir itirən nə tapar...

***

hə, ayaqqabını yerə sağlam bas,

paltarına bürün,

kölgənlə sürün...

düşün papağını başına qoyanda;

papağını düşün boş qalmasın, ya...

əlcəklərin bərk üşüyür?

əllərini geyindirsənə,

bilmirəm, gözün düşürmü gözlüyünə...

belin kəmərini sıxır,

nazildib kəmərini...

onsuz da xeyrimizə işləmir vaxt, zaman,

aç qolunu saatından...

***

Səni and verirəm ucalığına,dağ,

əlçatmazlığına,

ətəyindən üzülməyən dumana,

çisəkləyən çənə,

başında günəşi

xonçatək tuta bilməyinə,

başın üstə çaxan şimşəklərə and verirəm,

bir də vıy-vıy əsən küləklərə,

səni and verirəm

xırda-xınalı daşlarına,

daşlarından keçmişin silinməyən izinə,

o daşların çopur üzünə and verirəm,

and verirəm yamacına,yalına,

dar cığırlarına,

yekəağız kahalarına and verirəm,

and verirəm dağlığına,

qoyun-quzunun

daşları çıqqıldadan göyçək dırnağına,

ayağına

dərin dərələri geyinmisən-

onlara andım olsun,

nədir məndəki bu əbədi hüzn-

həmişə qəlbimin qanıyla doludu ovcum...

***

bürün gecənin qaranlığına işıqlan,

yorulub yorğunluğunu al,

toxluğu öyrən ac qala-qala,

sev, qoy sənə nifrət etsinlər,

Lap elə üstündən keçib getsinlər...

kiminsə soyuqluğuna baxma,

bir xatirəni bağrına bas isitsin səni.

bil ki,

düşüb yıxıldığın yer

ən uca taxtındı, şahlanacaqsan,

bütün ucalıqlar sənin olacaq,

bütün ucalıqlar- quyu dibləri,

nəmli zirzəmilər, uçuq divarlar,

kədərlə, acıyla bəslənəcəksən-

günlərin xoş keçəcək

biri-birindən--

daha çox acılı

və ağrılı, sancılı,

onca xoşbəxt olacaqsan ha,

borc dərd alacaqsan çəkməyə;

həsrət qalmamaq üçün

odlu göz yaşları tökməyə, hə...

BOŞ BEŞİYƏ LAYLAY

laylay çalıram boş beşiyə,

boş beşikdən üzümə

zillənən üzü görürəm,

nəmdi əlimin içi, üstü, görürəm...

Nigar xanım boş beşiyə

laylay çalır,

gözümü yuxu alır...

boş beşikdən atılıb qucağıma

bir körpə boynuma sarılır...

boş beşiyə laylay çalanlar hey,

xəyalınızda bir uşaq ağlar...

kimsə başına gələnlərdən

əyirib, toxuyub bir dastan bağlar...

başımı əymişəm boş beşiyə,

siz nə deyirsiz deyin

laylay çalmaq yaraşmır kişiyə...

dinməyin, beşiklərdə

nənələrin, anaların laylayı yatır-

laylayların ən xası,

göz sürməsi, əl xınası laylaylar...