Bir şair inadı nə boyda imiş,

Amma oturduğu balaca dam var.

Mən tək deyiləm ki, mənim içimdə

Üzünü gizləyən başqa adam var.

Mənə dərvişliyi kim öyrətdi ki-

Kim mənim əlimə verdi əsanı?

Bayquşlar içində kef etsin deyə

Qartallar haçandı xaraba salır...

Dərdə ağlamazlar, dərd ağladarlar,

Gəl, gəl, gözlərinin yaşını kəsək.

Şeytanın başını kəsə bilmədi-

Gətir o qılıncın başını kəsək...

Günəşə nə qədər yol qalıb görən,

Atsam qaranlığı yanar ocaqda?

Bəlkə həqiqətdi o sısqa adam

Dayanıb bir soyuq dayanacaqda?

...Bir şair inadı nə boyda imiş,

Amma oturduğu balaca dam var.

Mən tək deyiləm ki, mənim içimdə

Üzünü gizləyən başqa adam var...