Yağdı gecələrə qar yığın- yığın,

Torpağın ağappaq nəğməsi yağdı.

Qaynar uşaqlığın, şən cavanlığın

Qartopu oynamaq həvəsi yağdı.

Bir bölük sevinci, bir topa qarı

Budaqlar havada tutub saxladı.

Tullayıb çiynundən qaranlıqları,

Ağaclar saçına ağ lent bağladı.

Hər bağı, bağçanı qucaqladı qış,

Təbiət göründü gümüşü kimi.

Məsum bir körpənin südə bulaşmış

Təbəssümü kimi, gülüşü kimi.

Ağ fərəh geyindi əyninə hər yan,

Qar yağdı quraqlıq qorularınıa.

Qar yağdı,

Qar yağdı

Bizdən nigəran,

Kövrək anaların yuxularına.

Düşdü ortalığa buz sərhədləri,

Meşələr həsrətlə yollara baxdı.

Üç ay sevənlərin görüş vədləri

Qalıb ortalıqda darıxacaqdı…

Yox, yox üfüqlərdən doğacaq səhər,

Qalxacaq yuxudan hər kənd, hər şəhər

Addımlar yolları bəzəyəcəkdir.

Düm ağ kağızlara bənzəyən çöllər

Bir not dəftərinə bənzəyəcəkdir.

1971- ci il.