Keç yolun sağında dayan,

bax solu nə qədər uzaq;

Burdan ora adlayınca

elə et ki, çıxasan sağ...

Bir anlıq xəyala dalıb

əlini apar çənənə;

Hey fikrə getmək, əslində,

kökdən gələn bir "ənənə"...

Salama uzanan əllər

çox yaxınmı bir-birinə.

Dünya gözünün önündə,

vaqifsənmi bir sirrinə...

Papağını qoy qarşına,

nöqtə boyda yer- bu cahan.

Bir yanında düşür axşam,

bir yanında sökülür dan...

Bir anda yer-göy qovuşur,

dəyir bu dağ o dağa, bax...

Səmada tək hamı üçün

nur saçan o çırağa bax...

Heç bir qarışın da deyil;

eh, bu ucsuz-bucaqsızlıq...

Qaranı ağın yerinə

qoymaq var isə, haqsızlıq...

O axan su bir xəbərmi

min il, milyon il sonradan.

Olur, heç şah deyən də yox,

amma ki, mat qalır adam...

Bir ovuc kül zaman-zaman

yanan ürəklərin qoru...

Bil, kimsəsiz ev kimisən,

hər küncün hörümçək toru...

Var qulağınla gördüyün,

gözünlə eşitdiklərin;

Mərc üçün bir uzat hələ

gör özünə çatır əlin?.