Kaş

o vaxtki tək

İyirmi-iyirmi beş yaşım olaydı.

Atalar demiş:

"Bir əlim,

bir başım olaydı."

O şəhərə uçmaq üçün biletim,

orda

yolumu həsrətlə gözləyən

köhnə həmdəmim,

məni

hər an gözləyən, soraqlayan

sevimli

sirdaşım olaydı.

Ötənləri yad edib

düşünəydim doyunca.

Bizim "Tarqovi"ni xatırladan

"Starıy Arbatda"

əlimdən bərk-bərk tutan

o illərin

doğma, əziz istəklisiylə

yorulunca gəzəydim...

Səs ver səsimə,Tanrı,

yetiş dadıma.

Fikrimi, xəyalımı

o yerlərə-

uzaqlara aparma.

Qəlbimi

göynədən xatirələri

tez-tez

salma yadıma...