1. Ağırlıq

Son qəpiklərimi də xərclədim –

iki dənə siqaret aldım, bir çörək;

sanki indi şalvarım düşəcək

bomboş ciblərimin ağırlığından...

2. Boşluq

Uşaqlar bir az da

ailə fotolarında

kişi ilə qadın arasındakı

boşluğu doldurmaq üçün

doğulurlar...

3. Divar saatı

Hərdən divar saatının

yerindən özümü asmaq

keçir ağlımdan –

bəzən boş zamanları

öz bədəni ilə

doldurmağı bacarmalı insan!..

4. Elegiya

Bir payız günü

babam öldü...

Gözləri

qoşa pəncərə kimi

günəşə örtüldü –

evimiz qaranlıqda qaldı,

günəşimiz soyuqda...

5. Və...

Nə sərxoş idim,

nə də yorğun,

sadəcə

qəfildən ürəyim istədi

yanından keçdiyim çoxqatlı binanın

bumbuz divarına söykəndim -

soyuqluğu

dalğa-dalğa yayıldı bədənimə

üşüdüm

və

üşəndim:

sanki dünəndi

Müşfiqin zalımca güllələndiyi

Hadinin xəbərsizcə öldüyü...

və

nə qədər xatırlamağa çalışsam da

düşmədi yadıma

sonuncu dəfə

gözümün içinin nə vaxt güldüyü!..

6. Yuxuyozma

Dalbadal

üçüncü gecədir

yağış yağır yuxularımda,

sonra da

burnuma quru ot qoxusu dəyir...

ağlayıb ayılıram...

Ayılıb anlayıram:

bu səs-küylü

boz-bulanıq şəhərdən

çox uzaqda –

uşaqlığımın keçdiyi,

yağışdan sonra

quru ot qoxuyan,

qaratoyuqlar oxuyan

o doğma yerlərdə

məni çoxdan unudublar...

7. Son

Yollar, siz gedin,

mən yorulmuşam...

/noyabr, 2014 – iyul, 2015/