Görən qalmadı ki yağışın altda-

Görən o sərçəyə bir dam aldılar?

Getdim bir ağaca salam verməyə

Yarpaqlar yüz yerdən salam aldılar.

Özümü payızın üstünə atdım,

O yanda bir çay da gözə dəyirdi.

Bala göyərçinin ağ dimdiyində

Bir buğda dənəsi gülümsəyirdi...

Bir qızın saçları axırdı çaya,

Bu saça qoşulub çay axacaqdı.

Qızın gözəlliyi bəlkə bir azdan

Bu axan çayı da saxlayacaqdı...

...Ağzına su alıb, susub dəniz də,

Mən necə dindirim dənizi indi?

Gördüm bir ağıllı suya daş atır

Görəsən neynəyir dəlisi indi?!

...Görən neynədi o islanmış çiçək-

Öz yaş paltarını dəyişə bildi?..