Arzu Hüseyn - Sən arxamca ləpələnən Xəzərsən
Ədəbiyyat
09:45 / 12.10.2026
Baxış sayı: 731
Sən arxamca ləpələnən Xəzərsən,
Dalğa-dalğa xəyalımda kükrəmə!
Bir gün yenə qərarımdan küsərsən,
Gedişimi sorğulama, təkləmə.
O əvvəldi — sən günahkar, mən yazıq,
Bağışladım, əfv elədim, buraxdım.
İndi yazda qan donduran ayazıq,
O dövlər qanmaz idik, uşaqdıq.
Qəlbimdəki sükunəti dinləsən...
Yox, dinləmə... Ömürdü də, gündü də.
Ara-sıra başım üstə kölgəsən,
Ara-sıra — demirəm ki, indi də.
Kim caladı taleimi adına?
Bulanığam, qurumuşam, dayazam.
Heyva dadlı, nar qoxulu qadınam,
Yada salıb ağladığın payızam...
