Astara rayonun Sım kəndi yaxınlığında - dəniz səviyyəsindən təxminən 1800 metr yüksəklikdə yerləşir . Tarixi , İslamdan əvvəlki əsrlərə gedib çıxır . Bəzi tarixçilər 7 - 8 - ci əsrlərə , digərləri isə daha qədim - Sasani dövrünə ( 3 - cü əsr ) aid olduğunu bildirirlər . Şindan qalası əzəmətilə , ona baxanları heyrətə salır . Yolları keçilməz olsa da , qalanı ziyarət etmişəm .

Şindan qalasında yorulub zaman ,

Sükutun fəryadı - ruhun səsidir .

Zirvədən dərəyə tökülən çayın

harayı - " Qarabağ şikəstəsidir " .

Oxlar yağış kimi yağıb göylərdən ,

Divarlar oxlara sipər olublar .

Düşmən tufan kimi gəlib üstünə ,

Qeyrətdən sədd çəkib - çəpər olublar .

Atların nal səsi daş küçələrdən ,

Qan iyi qalanın bürcündən gəlir .

Divardan bürclərə qalxan ağaclar ,

Döyüş bayrağı tək göyə yüksəlir .

Buludlar qalanın xəyallarıdır ,

Əskilməz başından bir an buludu .

Ayın şəfəqləri nəm çəkib gecə -

Şindan başı üstə asıb , qurudur .

Səni vəsf eylədi Qətran Təbrizi ,

Adına qəsidə yazdı Xəqani .

Babək Xürrəminin səngəri - qala ,

Vaxtın daş sandığı , dağlar xaqanı !

" Bir pəncərə imiş , bu qala - dünya ,

Gələnlər dünyaya baxıb , gediblər ."

Zaman kəklikotu qoxusu verir -

Vaxtı çay tək içib , çıxıb , gediblər .

21 . 0 5 . 2026