Qoy üzülsün,

Qır bu ipi,

Kəndirini kəs bu sevdanın.

Mən sənə yaraşmadım,

Doğma bilmədin məni özünə.

Çox gecdi,

Təsəlli də gərək deyil mənə.

Köksümə dağ basaram,

Köz-köz alışaram,

Dərdimi özümə danısaram,

Susaram min il.

Söz-söz çiçəkləyərəm,

Ömrün payızında.

Könlümü həsrətə kökləyərəm,

Bir eşqin sazında.

Səsimi içimə qısaram,

Susaram...bir ömür.

Göz yaşımda yoğrularam,

Öz külümdən doğularam

Hər gün,hər saat.

Mən yaxşı bilirəm

Açısını təkliyin.

Sədası buludları kişnədər

Ürəyimdə səssizliyin.

Sükutum dağdan ağır,

Dəryadan dərin.

Son fitini eşitmədin

Sinəmdə batan gəmilərin.

Dalğası yanağımdan süzülər

Bağrımdakı dənizin,

Duzu əllərimə çıxar.

Naləsi ərşi yandırar

Qəlbimdəki neyin.

Nə deyim?!

Daha qucaq olmaz qolların.

Hara yozsan,

Üzü ayrılığadı yolların