Şakir Xanhüseyinli - UCUZLUQDU CAN BAZARI
Nə gözəl uçurumdu bu,
uçuram bu uçurumda...
Uçurumdan düşmürəm ki,
elə özüm uçuram da...
Ey göz yaşı uçurumum,
qoynunda yelkən açmışam-
Arzularımın ardınca
mən də bu sayaq uçmuşam...
Ucuzluqdu can bazarı,
bax, can canı ucuz tutur...
Kiminsə yeri boş qalır;
ən dərin uçurum budur...
Nə deyim ki, belə hala,
dağılıb-uçmağım gəlmir;
Durub bir uçurum üstə
heç qanad açmağım gəlmir...
Amma hər an uçuram mən,
qanadsızlığıma inad;
Uçuram bir uçurumdan,
uçuram, ey dadi-bidad...
Bu uçmağın iki başı-
kimsə evmi uçuracaq;
Məni atıb uçurumdan
elə bilir uçuracaq...
Bəzən olur bir uçmaqdan
qorxunc uçurum yaranır;
Uçurum uçmaqla imiş,
yoxmuş bunun başqa yanı...
Bir uçmaqda qanad, səma,
bir uçmaqsa tamam ayrı;
Bəzən gözləmirsən, amma
uçur bir ümid divarı...
Mənim dərin uçurumum,
uçuram, sənə uçuram;
Asta-asta, aram-aram,
qanadsız da nə uçuram!..