Yaxşı ki, dünyada yaxşılıq ölmür,

Yaman deyiblər ha- yamandı dünya.

Bu gün baxarsan ki, taxıl zəmisi

Sabah baxarsan ki, samandı dünya.

Hər gün torba tikər iynəsi, sapı,

Çoxdan itiribdi haqqı-hesabı.

Bir bəyin evində quzu kababı

Bir qul komasında yavandı dünya.

Kimə səfası var, kimə cəfası,

Yas kimi toyu var, toy kimi yası.

Kimini oynadan oyun havası

Kimini ağladan kamandı dünya

Haqsız ola-ola ölüm də haqdı,

Min yaşı olsa da, hələ də sağdı.

Ömür dediyimiz silsilə dağdı

Bu dağ ətəyində dumandı dünya.

Günəş göylərindi, kölgə dünyanın,

Daş atıb kim çəkdi bərkə dünyanı?

Tavanı deşilib bəlkə dünyanın-

Haçandı üstümə damandı dünya..