Əbülfət Mədətoğlu : - Mən indi...

Ədəbiyyat 08:20 / 13.02.2024 Baxış sayı: 735

 

Budaqları çırpılmaqdan göynəyən

Tut ağacı halındayam mən indi...

Buludunun bir ucunu göy döyən -

Get!-inndə həm, qal!-ındayam mən indi...

 

Çəkə, çəkə ağrıların zülümün

Dodaqların çartlatmışam günümün!

Bax, üzünə güldüyüm bu ölümün -

Saçlarının çalındayam, mən indi!..

 

"Ah" isinən ürək adlı otağın,

Həsrətindi açıb, yığan yatağın!..

Zirvəsində qar tarlanan o dağın -

Günəş batan yalındayam mən indi...

 

Toxtaqlıqdı dünənimin seyiri,

Kimdi dəlin, Əbülfətdən qeyiri?!,

Hansı vədə, oxusan bu şeiri -

Biləcəksən yanındayam mən indi!