Afiq Muxtaroğlu : -  Demirmi?

Ədəbiyyat 09:03 / 03.10.2024 Baxış sayı: 1424

 

***

Qara-qara sevdaların adına,

İçdiyimiz şərabların dadına,

Baxıb-baxıb öldüyümüz qadına,

Kimi günah, kimi savab demirmi?

 

Ürək deyən əvvəl-axır düz olur,

Son görüşün baxışları buz olur,

And yerimiz çörək olur, duz olur,

Kimi Quran, kimi kitab demirmi?

 

Get-gəl olar, yollarımız aşınar,

Çırpılarıq çınqılına, daşına,

Bu, dünyanın hərləndikcə başına,

Kimi niyyət, kimi təvab demirmi?