Ramiz Qusarçaylı -Udduğum hər oyunda
Ədəbiyyat
14:11 / 26.07.2026
Baxış sayı: 359
***
Udduğum hər oyunda
Şərti dəyişdirdilər.
Gördülər zərim verir,
Nərdi dəyişdirdilər.
Pozub ritmi, bəstəni,
Sovurdular dəstəni
Hər yerdə xor bəslənir
Fərdi dəyişdirdilər.
Nə üstə tül çəkirdim,
Nə bezib əl çəkirdim,
Elə gözəl çəkirdim
Dərdi dəyişdirdilər.
Ta ovutmur sükut da,
Çox üşüdüm bu odda,
İçimdəki mən adda
Mərdi dəyişdirdilər.
