Şəhərlərin içində

Bu şəhər öz şəhərim.

Bir az nağıl, bir az mif,-

Bir az da söz şəhərim.

Tarixin baş kitabı,

Kitabların yuvası.

Ayağında dəniz var

Başında dağ havası.

Hər daşı bir türbədir,

Hər türbədə ocaq var.

Bu şəhəri hər səhər

Allah özü qucaqlar.

Aya Sofya aylanır,

Ay boylanır Çarşıdan.

Düşmən kəssə körfəzi

Fatih çıxar qarşıdan...

Yer şəhərdi, Göy şəhər,

Şəhər-şəhər kölgəsi.

Ölkələrin şəhəri

Şəhərlərin ölkəsi.

Seyrantəpə seyrangah,

Boğaz içi,- iç yazı.

Iki qitə əlində

Avropanın yaxası...

Bu şəhərin şəklini

Gözlərimə toxudum.

Küçə-küçə tanıdım,

Adam-adam oxudum.

Yerdən boy verir Göyə,

Göydən tutan şəhərim.

Paşam, Şahım, Fironum

Mənim sultan şəhərim.