Başlatdılar türkə qəsdi qəflətən,

"Qara əl" qapını kəsdi qəflətən,

Əsdi qara yellər, əsdi qəflətən,

Arzular, ümidlər yuvada qaldı-

Ağrılar, acılar Cavada qaldı.

Ailə qürurundan enmədi bir an,

Ocağının közü sönmədi bir an,

Türklük amalından dönmədi bir an,

Alnına yazılan davada qaldı-

Ağrılar, acılar Cavada qaldı.

Beləcə başladı qardaş dastanı,

Qazax ellərinin sirdaş dastanı.

Türkün bir can, bir qan-yaddaş dastanı,

Silinməz izləri, obada qaldı-

Ağrılar, acılar Cavada qaldı.

Bir nəslin adıyla böyüdü zaman,

Köksünün harayı, köyüdü- zaman.

Atanın, ananın öyüdü - zaman,

Qurtuluşun yolu savada qaldı-

Ağrılar, açılar Cavada qaldı.

Bu da bir ömürdü, keçdi, beləcə,

Ulusun yoluydu, seçdi, beləcə,

Şərəflə dünyadan köçdü, beləcə,

Doğmalar doğmaya, yad yada qaldı-

Günəşli sabahlar Cavada qaldı