Atam tək qəddini düz tutub bu ev ,

Fərəh gətirmişəm solan bağçaya .

Sərçələr elə bil şabaşa dönüb ,

Sevinc tək səpilib həyət - bacaya .

Süddən tez kəsilən körpələr kimi ,

Anasız çiçəklər sünbülə döndü .

Bağda ağaclar da sınıxıb bir az ,

Yetim uşaqlar tək böyüyür indi .

Başıalovludur təndirimiz də ,

Ana əllərinin közərir izi .

Vaxtın əl işidir çatlaq divarlar-

Payız yarpağı tək qırışıb üzü .

On səkkiz yaşım tək qaynayır qanım ,

Hər səni görəndə , ata ocağım .

Belə qəmli durma , başına dönüm ,

A layla ətirli uşaqlıq çağım .

Boynumda qolunun yeri üşüyür ,

Məni qucaqlayıb , öpəydi anam .

Deyəydi , can bala , boyuna qurban ,

Çıxaydı ağrılar tər tək canımdan .

03 . O6 . 2026