Əlizadə Nuri - Dönüb bir ağac oldum
Ədəbiyyat
16:03 / 10.05.2026
Baxış sayı: 592
Gördüm ki darıxırsan
Adamların yanında,
Tək sənin yaşadığın
Təzə ölkə yaratdım!
Çiçəklər əllərini
Qoxlamağa gəlibmiş,
Tələsən çiçəkləri
Yığıb cərgə yaratdım.
Hər gün "günah" eyləyib-
Əsir düşdüm mən sənə.
Bu "əsir "günlərimdən
Bir düşərgə yaratdım...
Ağac kölgəsinə də,
Qısqanırdım mən səni-
Dönüb bir ağac oldum
Özüm kölgə yaratdım.
