Əlizadə Nuri : - Daha bir kimsə yox əl yelləməyə...

Ədəbiyyat 19:44 / 16.09.2024 Baxış sayı: 2437

 

 

Zil kimi oxuyur bəmdə bu zalım,

Saldı çox bəndəni bəndə, bu zalım,

Göz yaşı qoymadı məndə bu zalım-

Daha dərd görəndə gülüb keçirəm.

 

Gördüyüm adamlar kölgə kimidi,

Ümid- üşüdüyüm ölkə kimidi.

Sevincim sonuncu tikə kimidi

Tikəmi hamıyla bölüb keçirəm.

 

...Gəldin ilk görüşə son söz deməyə?

Sanki cərəyandı toxunsam nəyə.

Daha bir kimsə yox əl yelləməyə-

Əlimi yanıma hörüb... keçirəm...