Əlizadə Nuri : - Allah, bu nə oynamaqdı?

Ədəbiyyat 21:45 / 11.03.2025 Baxış sayı: 1978

 

Aşığa bax, gözü göynən,

Barmağı saznan oynayır.

Üstünü çırpan bir uşaq

Oturub toznan oynayır...

 

Bu şərabdı, ya eşq camı?

Çıx qarşıla bu edamı...

Boğulmaqdan qorxur hamı-

Hamı dayaznan oynayır.

 

Bu ömürdü, ya səfərdi?

Darıxıram, çağır dərdi.

O nəğmə nə bəxtəvərdi-

Bir gözəl qıznan oynayır...

 

Yol dayandı, dayan adam,

Sənin deyil o yan, adam.

Dünyayla oynayan adam

Elə bil köznən oynayır.

 

Hara gedim, hara haqdı?

Mən axsağam, yol axsaqdı?

Allah, bu nə oynamaqdı-

Göz yaşı göznən oynayır?!