Ələddin Əzimli - SÜSTLÜK

Ədəbiyyat 12:14 / 19.10.2026 Baxış sayı: 647

 

Bir qayıq,

bir dəniz,

bir də sənlə mən.

Bilmirəm, səfərə çıxırıq,

yoxsa,

qayıdırıq artıq səfərdən.

Elə bil,

yarıyuxuluyam,

bir az da yorğun.

Dəniz də sakitdir,

süstür nə isə.

Bizsə oturmuşuq

dinməz-söyləməz,

sükut içində.

Yüngül meh də əsmir

yelkən açıla,

qayıq tərpənə.

Hətta, səmada

bir qağayı belə dəyməyir gözə.

Nə olub,

görəsən, coşqun dənızə,

qabarmaq istəyən yelkənə,

sevgi, istək dolu ürəyimizə?

Günəş

sanki yorğun-arğın

sərilib suyun üzünə.

Bizsə çiyin-çiyinə

qısılmışıq

bu susqun yelkənin

yarımçıq kölgəsinə...

16. 10. 2021.