Saqif Qaratorpaq : - Adamlar

Ədəbiyyat 08:32 / 30.04.2025 Baxış sayı: 1266

Birini dərd yıxır,kədər öldürür,

Durub sakit-sakit baxır adamlar.

Büdrəsə,kimsənin tutmaz qolundan

Üzü gümüş,içi paxır adamlar.

 

İşimiz-gücümüz belə oyundu,

Hayana çevirsən elə oyundu...

Hələ oynayırıq,hələ oyundu,

Gündə min oyundan çıxır adamlar...

 

Bu necə ülgüdü,bu necə biçim?

Yanana su verməz barı bir içim.

Hansını tanıyım,hansını seçim,

Üzünə neçə üz taxır adamlar.

 

Unudub həyanı,itirib arı,

İndi çoxu danır əhdi,ilqarı.

Elə ki buraxdın könlünə sarı,

Adamı içindən yıxır adamlar.