Yazıçı, alim dostum Yasif Nəsirliyə

Məni öz gözümdə böyüdən kişi

Əlinin üstündə Tanrı əli var.

Xeyirxah istəyə köklənən işin

İlahi sədalı gəlhagəli var.

Şeirimə bələdsən illərdən bəri

Dedin sən layiqsən o ada, layiq.

Ay sənət sərrafı, şeir zərgəri

Mənə dəyər verdin ustada layiq!

Üfüqlər boyunca sözün mənzili

Uzandı, qovuşdu ərşi-əlaya.

Nə yaxşı ki, varsan dil açır dilim.

Necə minnətdaram sənli dünyaya.

Haqq harda, sən orda, ucadır yerin

Xəyalən uçuram mən də yanına.

Qədir bilənisən sənətin, şeirin

Heyranam zövqünə, alim şanına!

Dedin sən layiqsən bu ada layiq.

Mənə dəyər verdin ustada layiq.

Yolumda, izimdə söküləndə dan

Gecikdim, yadlandım şöhrətə, ada.

Sağlam can umuram uca tanrıdan,

Ayrı umacağım yoxdu dünyada!

Mənə “yaxşı şair” deyirsə hamı,

Yoluma daş yığan bə kimdir mənim?!

Dövrümün mötəbər ali adamı,

Verdiyin bu dəyər bəsimdi mənim!!!

                                          08.05.2025