Əsl sevdiyinə kim qovuşur ki...

düşün ki, o hələ doğulmamışdır,

nə də doğulacaq, sən isə onun

O gözəl, sevimli üzünü heç vaxt

yadından çıxara bilməyəcəksən;

əlini əlindən ayırma əsla,

bax a,

sən, axı, təksən...

Elə xəyallara dalıb gedəcək,

qəlbinin səsini eşidib, ancaq

özündən gizlənmək istəyəcəksən...

Doğma bir nəfəslə həmnəfəs olmaq

şirin bir diləktək qalsa gözündə,

"kirpiyim ucunda nəm leysan yağış"

deyib için-için inləyəcəksən,

sən axı, təksən...

Bir də qabağına süfrə sərəndən--

soyuyan çayını isidənindən

ruhuna bir qüvvət verən sözləri

eşitməyə ümid bəsləyəcəksən...

Doğrundan yalanı arındırmağa

ən əvvəl Özünü dinləyəcəksən,

sən, axı, təksən...

Qalxıb bir küçənin tinində durmaq,

sonra ətrafında baş verənləri

ağıl süzgəcindən keçirmək üçün

durub uzaqlara göz dikəcəksən;

adi bir məntiqlə yaşamaq çətin...

O zaman söykənib uçuq bir dama

dağıntılar altda qalmamağına

bir çarə tapmağa gecikəcəksən;

sən axı, təksən,

sən, axı, təksən!