Şakir Xanhüseyn : -BAYATILI ŞEİR

Ədəbiyyat 08:45 / 08.05.2025 Baxış sayı: 1120

 

Yarama bir məlhəm qoy

bir məhrəm söz ilə sən...

qəlbi yuvam dağlarda,

qəlbim dağ-dağ, biləsən:

Sən biləsən,

nə çəkirəm biləsən...

gərək bir közünü də

yüz ocağa böləsən...

Bürün ağrılarına,

göynəyini gey indi;

kim ar, kimsə arsızlıq

köynəyini geyindi:

Ağ gey indi,

qaranı ağ gey indi...

daim bu fikrində qal:

qara- yerin, ağ- göyündü...

Düyün içində düyün;

bir düyünü açıb bax...

necə naxışlar salıb

üzündə bir acı, bax;

Gözüm, acı-acı bax,

min bir dərddi, bir can, bax...

canını çox istəyən

canbaz olubdu, canbaz...