Kölgəsinə sığındığım, sevdanın rəngi başqadır...

Qaranlıq içində nura bürünür,

Aydınlıq içində gözə görünmür...

Bu tapmaca deyil, yanıltmac deyil...

Kölgənin kölgəsi, kölgədən deyil...

***

Sətir-sətir, cümlə-cümlə oxu məni,

Nəğmə kimi ürəyinə toxu məni.

Mən səninəm, bir ömürlük sirrin olub,

Xəyal kimi, arzu kimi qoru məni.

***

Sətirlərin xatirəsi,  fikirlərin əsiridir...

Cümlələr də qucaq açmış, duyğuların nəsibidir...

Duyğuların küləyinə tutulsan, çox ağrıyarsan...

Eşqin günəşində qalsan, yanmağa alışmalısan...

***

Sevmək yaraşmır mənə,

Sevilmək olmur, əynimə.

Sökülür, ümid telləri

Ölçülər, düz gəlmir gözə.

***

Kitablardan oxusam da,

Həyatdan dərsimi aldım.

Vərəq-vərəq yazılsam da,

Bir cümlədə tamamlandım.