Ey!.. Can anam! Səndən sonra

Mən ömrümün yollarında

Büdrəyə-büdrəyə qaldım!

Qar-sazaq, şaxta bir yana –

Yayın qızmar günlərində

Titrəyə-titrəyə qaldım!

Mən ki hələ uşaqmışam,

Qəlbi kövrək, körpə uşaq...

Yoxluğun anlatdı mənə –

Dərddən-qəmdən uzaqmışam,

Dərd tanıdı üzü yumşaq,

Kəməndini atdı mənə!

Bilirsənmi, sənsizliyin

Yaşı, artıq dörd olmaqda,

Boy atıb da böyüməkdə.

"Ana!" – deyib, illər öncə

Sənə sarilan qollarım

Uyuşmaqda, keyiməkdə.

Səndən sonra hürkək olub,

Qorxa-qorxa yaxınlaşır,

Sevincim də, fərəhim də.

Tanımazdı qəm könlümü –

Nə zaman ki sən var idin –

Sevincimdə, fərəhimdə!

Gecə-gündüz, səndən ötrü

Sızladıqca qılıqlayıb,

Əridirəm ürəyimi.

Konfet kimi şirin sözlə

Aldadıram uşaq kimi,

Kiridirəm ürəyimi...

Anam, anam, sən gedəli,

Bizi atıb tərk edəli –

Dörd il olur... dörd il olur...

18.05.2025