Xanım İsmayılqızı : - Bütün xəstələri sağaldan həkim

Ədəbiyyat 09:44 / 18.06.2025 Baxış sayı: 842

Bütün xəstələri sağaldan həkim,

Mənim azarımın əlacını tap.

Hər gün qaşıq-qaşıq yediyim balı

Zəhərə çevirən bu acını tap.

 

Bir iynə vur mənə, huşu itirim,

Kəs, doğra canımı, ziyanı yoxdu.

Onsuz da vücudum bəla içində

Sızlayır, ağrısız bir anı yoxdu.

 

Ürəyimi çıxar, yenisini qoy,

Beynimi parçala, fikirləri yu.

Gözümün dibinə işığı göndər,

Ora düşüb qalan şəkilləri yu.

 

Qanımı təmizlə, qanım qaralıb,

Axıt, yeni rəng vur, tap bu çözümü.

Bütün xəstələri sağaldan həkim,

Elə et, tanıya bilim özümü.