Xanım İsmayılqızı :   -Bataqlıqda...

Ədəbiyyat 22:45 / 25.01.2023 Baxış sayı: 2468

Bataqlıqda,

Xoşbəxtliyi düşünmək qədər absurddu

Həyat...

Yalnız azad olmaq istəyi var...

Harasa atılmaq çırpıntısı qalır...

Harda olsa yaşamaq gələ,

satmaya səni ona-buna...

O da canını ya ala, ya almaya...

 

Bataqlıqda,

Tapa bilməyəcəyini bilə-bilə,

gücsüz qalan ayaqlarını və əllərini,

bir də azan başını axtarırsan...

O da ya salamat qala, ya qalmaya...

 

Bataqlıqda,

Ölümün də əlindən tutacaq qədərdi məna...

Nəfəsinin harda gəzişdiyini də unudub,

qayıtmaq ümidində üzülürsən...

O da içinə ya dola, ya dolmaya...

 

Bataqlıqda,

Papağını qarşına qoyub düşünmək yeri yox...

Düşüncən də bataqlıq kimidi,

Hər şeyi batırıb...

Səsin sözündə batıb,

Sözün də adamların qulağında...

Ümidin Allaha qalıb...

O da yanında ya ola, ya olmaya...