Babur... O, 1483-cü ildə indiki Özbəkistan ərazisində yerləşən Əndicanda doğulub və məşhur türk-moğol hökmdarı Teymurun nəslindəndir. Anası tərəfdən isə Çingiz xanın soyundandı.

Babur çox gənc yaşında hakimiyyət uğrunda mübarizəyə başlayıb. Fərqanə taxtına çıxsa da, uzun illər Səmərqənd uğrunda savaşmışdır. Lakin Mərkəzi Asiyada möhkəmlənə bilmədiyi üçün diqqətini Hindistana yönəldib.

1526-cı ildə Panipat döyüşündə Dehli sultanı İbrahim Lodini məğlub edərək Moğol İmperiyasının əsasını qoymuşdur . Bu imperiya sonradan Hindistan tarixinin ən qüdrətli dövlətlərindən birinə çevrildi.

Babur təkcə döyüşçü deyildi. O, çox savadlı və incə ruhlu insan idi. Çağatay türkcəsində yazdığı Baburnama türk-islam ədəbiyyatının ən qiymətli xatirə əsərlərindən sayılır. Bu kitabda o:

öz həyatını,

döyüşlərini,

sevgilərini,

təbiətə münasibətini,

şəhərləri və insanları çox səmimi dillə təsvir edir.

Baburun şəxsiyyətində qəribə bir ziddiyyət vardı:

bir tərəfdən sərt fateh, digər tərəfdən həssas şair.

O, bağları, çiçəkləri, axar suları çox sevirdi. Hətta Hindistanda olarkən belə Orta Asiyanın havası və dağları üçün darıxdığını yazırdı.

1530-cu ildə vəfat etdi. Sonralar nəşi Əfqanıstanın Kabul şəhərinə aparıldı və orada dəfn edildi.

Babur türk, özbək, hind və islam tarixində çox böyük iz qoymuş hökmdarlardan biri sayılır.