İSMAYIL MƏRCANLI - SALAM ƏLEYKÜİM

Ədəbiyyat 22:11 / 26.04.2025 Baxış sayı: 884

 

Əldən çıxanda qismətim,

Bəndi-bərəni kəsmədim.

Səndən inciyib küsmədim -

Güzarım, Salam əleyküm!

 

Sevinc də, qüssə də gördüm,

Sözdən əlvan çələng hördüm.

Cismimdə sızlayan dərdim -

Azarım, Salam əleyküm!

 

Ucuz ad-san zərli palan,

Söz atını çapır yalan.

Kəlməsi urvatsız olan -

“Bazarım”, Salam əleyküm!

 

“Yuxarı başda” çullanan,

Boyundan iri tullanan.

Umsuq olanda yalmanan -

“Yazarım”, Salam əleyküm!..

 

Gah addımımı izlədin,

Gah boyumu əzizlədin.

Yolumu çoxmu gözlədin -

Məzarım, Salam əleyküm!

31.07.2019