Deyirsən ki, sevdiyim,

ürəyindən nə keçir,

sənə hədiyyə edim.

Ürəyimdən keçənlər

birmidir, ikimidir?!...

Məsələn, ikimizin

gəzə biləcəyimiz

bir isti qumlu sahil,

bir qucaq dalğa səsi,

bir dəstə quş sədası...

Bir Günəşli gün olsun...

Sonra bir Aylı gecə,

par-par yanan ulduzlar –

ikisi bizim olsun...

Mən başdan sona qədər

səfa olum səninçün,

sən səfanın aşiqi.

Bizi qanadlarına

alıb aparsın göyə

bir ecazkar musiqi.

Mənə hədiyyə eylə,

sevgi dolu xəzinə,

Gecə qaranlığında

Günəş doğsun üzümə.

Heç vaxt ölmür bir qəlbdən

digər qəlbə köçənlər,

Yaşamaq istəyirəm, -

bax budur

ürəyimdən keçənlər.

19.04.2023