vallah, bir-birimizdən

bu girey-gümbəz'

bir şeyə dəyməz...

aç gözünü xoş,

üzünü güldür.

bu dağ ömürlər

bir zərif güldür...

bir səma var, bax,

günəşi, ayı,

nur kəhkəşanı,

bulud alayı;

vallah, bu girey-gümbəz

bir şeyə dəyməz...

sevgiylə at addımını,

yad sandığın sənə yadmı,

neçə doğman, əzizin,

iki gözün

sənə yadmı?

gör, evlər bir-birinə uzaqmı,

qapılar bir-birini açır,

bir-birinin burnunun dibində

bitib otlar;

burda bir hikmət var:

yaxınlıq, iç-içəlik,

nə bir günlük,

nə bir gecəlik-

əbədilik-

gün şüasıyla süzülüb gələn eşq;

vallah, bu girey-gümbəz

bir şeyə dəyməz...

bir təbəssüm

bütün bir günün boyunun yaraşığı,

bir qanı qaralmışın açılan qırışığı...

səbəbiyyət vermə acıya,

nə rəva bir qəlb səndən inciyə,

acıya,

ya...

bax gör, bir ağac

ən ucadakına belə baş əyməz,

vallah, bu girey-gümbəz

bir şeyə dəyməz...

çətirdi bu boyda göy,

kölgəlikdi...

sığınmağa qucaqdı,

oddu-ocaqdı,

haqdı,

ağ alnımız, üzümüz

bu qara torpaqdı...

bir nəzərdən keçir gedəni, gələni;

ibrət deyil bəs?

vallah, bu girey-gümbəz

bir şeyə dəyməz,

heç dəyməz...

girey-gümbəz' dial.- giley-güzar

25.05.2025