Göyün ətəyindən elə tutasan,

Nə əlin utana, nə ətək çıxa.

Sənin istəyini gözündən duya-

Çobanın cibindən bir tütək çıxa…

Güneyin əriyən qarı kimiyəm…

Bir az günbatana sarı kimiyəm.

Çiçəklə sevişən arı kimiyəm-

Sevdiyim kədərdən bir pətək çıxar…

Bəxtim yola getmir niyə ağ ilə?

O bərki sındırdım bu yumşaq ilə.

Qaçıb oynayasan o uşaq ilə,

Hardansa yoluna çərpələng çıxa.

Elə sirr qalarsan, nə sirsənsə sən,

Dərdin də pas atmaz əsilsənsə sən.

İşıqdan yapışıb gəzirsənsə sən,

Qorxma - qabağına lap fələk çıxa.

Qəm də şərab kimi çıxar başına…

Qələmi güllətək sıxar başına.

…Axşam ulduzları yığar başına-

Ay da ürək etməz çölə tək çıxa…