Əlizadə Nuri : - Ağrı

Gündəm, Ədəbiyyat 09:09 / 24.11.2022 Baxış sayı: 568

 

Ondan təzə qəm istədim,

O, mənə nimdaşı verdi.

Dedik bizə gün ağlasın-

Dünya da göz yaşı verdi….

 

Sizə gəlib sən istədim,

Quş yox, quşa dən istədim…

Yaxşı bir düşmən istədim-

Pis qohum- qardaşı verdi.

 

Ömür verdi boynuburuq,

Ümid verdi qırıq-qırıq.

Baxıb gördü darıxırıq-

Söz boyda sirdaşı verdi.

 

Bu ki, şeytan dərəsidi,

Bu ki, iblis mərəzidi.

Bu, nə mizan-tərəzidi-

Bunu hansı naşı verdi?

 

Yıxıldıq zəli üstünə,

İşin əngəli üstünə.

Min nəfər dəli üstünə

Məni də minbaşı verdi…