: - QALIM

Saçlarını kəmənd et

at boynuma, tut qalım

bircə udum hava tək,

Çək içinə, ud qalım.

Gedirəm, hey gedirəm,

Mövlanayam, qədirəm

Bilirsən ki, bilirəm,

bilirəm, unut qalım.

Qoy sıxılım köksünə

Bələnim nəfəsinə

Qəlbinin bir küncünə

məhkum elə, at qalım.

Bil ki dərdə zahıyam

ağrısıyam, ahıyam

məğlub yurdun şahıyam

qoşunu çək, mat qalım.

Heymi qaldı qolumda

sən inzafsız, zalımda

ölüm sənin yolunda,

Yoxsa, salamat qalım?

           ***

Şimal qonşumuzun əməlləriylə

Göy üzü heç zaman təmiz olmadı

Bütün bəşəriyyət yox olsun, deyə

Qonşumuz çaqqal tək dişin qıcadı

Göy üzü ozündə qəzəb saxladı

Gündüz Günəşiyiylə, axşam Ayıyla

Qaramamat gətirdi, ölüm ağladı

Başımız qarışdı ulduzlarına

yağan yağısına, tökən qarına

Tüpürüm onların vicdanlarına...

Göyü gözümüzdən saldılar onlar

Sən demə yalanmış Allah deyilən

Varlığın oturması göyün üzündə

Guya yaradandır, yaratdığını

Necə yox edirlər gözü önündə.

Şimal qonşumuzdan qorxur, deyəsən,

Allah da acizdir, yoxsa. Bəlkə də

Allahın Allahı yoxdur, deyəsən.

Göyün üzündəki təyyarələrdən

Göyün üst qatına dualar uçdu

Əlimiz havadan asılı qaldı

Nağıl danışdılar rəsmilər elə

Gözlədik nağılın sonunu, amma

Yenə də göylərdən alma düşmədi

Göylərdən yaralı adamlar düşdü

Bizə ümid verdi bir mələk səsi:

Gözləyin, hər bir şey yaxşı olacaq...

gözlədik, heç bir şey yaxşı olmadı.