Sənə görə yaranıbmış bu dünya - Əlizadə Nuri

Ədəbiyyat 21:48 / 18.09.2023 Baxış sayı: 1091

 

 

Sevinc qaldı, dərdi-səri istədim,

Tanrı yazan o "əsər"i istədim...

Min nəfərdən bir nəfəri istədim,

Görən çoxmu bu umacaq?- bilmirəm.

 

Göyərmirsə, neynirsən söz əkməyi?

Hər quş bilməz kəklik kimi səkməyi...

Saçlarına yüz yol sığal çəkməyim,

O yetimi ovudacaq?- bilmirəm.

 

Yatmamışam -bəs nədir bu yozduğum?

Göl olmadı damla-damla sızdığım...

Günün yazıb qaranlığın pozduğu

Bu məktubum oxunacaq?- bilmirəm.

 

Əl atdığım O ƏTƏKDİ görəsən?

Gələcək də gələcəkmi görəsən?

Sənə baxıb görəcəkmi görəsən?

Görəcəkmi bu kor bucaq?- bilmirəm.

 

Çox soyuqmuş canıyanmış bu dünya,

Səni görüb daranıbmış bu dünya...

...Sənə görə yaranıbmış bu dünya-

Səndən sonra nə olacaq?- bilmirəm...