Aida Adıgözəl : - De ki...

Ədəbiyyat, Gündəm 21:37 / 30.09.2022 Baxış sayı: 1272

 

Gördün darıxırsan məni xatırla,

aç bax, səndə qalan xatirələrə,

çəpəki süzməmi, iynə sözləri,

de ki, - unutmaram, gülüşün haqqı...

 

And iç, ayaqlarım dəyən yollara,

de ki, - yığmayacam gözümü yoldan,

and olsun yollarda qalan şəklinə,

ta ki, gələnəcən, gəlişin haqqı...

 

De ki, - tanıyacam addım səsindən,

ürəyim çıxacaq tappıltısına,

pillələr öpəcək ayaq izindən,

and olsun, and olsun, yerişin haqqı...

 

De ki, - hələ nəmdi öpdüyüm yerlər,

de ki, - soyumayıb canımdan istin,

de ki, - yastığında telim qalıbmış,

dodağımda qalan öpüşün haqqı...