Azərbaycanda quşçuluq və heyvandarlıq üçün əlverişli mühit olsa da, bəzi çətinliklər ətin qiymətinin daim baha olmasına səbəb olur.

Yenises.az  bildirir ki, bunu  öz açıqlamasında Milli Məclisin Aqrar siyasət komitəsinin sədri Tahir Rzayev deyib. O, quşçuluq və heyvadarlıq təsərrüfatlarındakı problemlərdən danışarkən qeyd edib:

“Quşçuluq və heyvandarlığın inkişafı üçün lazımlı şərait var. Dövlət də bu istiqamətdə mühüm tədbirlər həyata keçirir. Bir çox regionlarda təsərrüfatlar fəaliyyət göstərir və bu, ölkədəki tələbatı müəyyən qədər ödəyir. Ancaq müəyyən çətinliklər də var. Bu çətinliklər dünyada yemin bahalaşmasından, dünya bazarında heyvandarlıq məhsullarının qiymətinin artmasından, idxal olunan məhsulun maya dəyərinin baha olmasından irəli gəlir.

Ətin qiymətinin baha olmasının əsas səbəblərindən biri də, bu sahə ilə məşğul olanların lazımlı tədbirləri vaxtında həyata keçirməmələrindən, məhsuldar heyvan və quş növlərinin yetişdirilməməsindən qaynaqlanır. İndi bu sahə ilə məşğul olan elə insanlar var ki, onlar müasir texnologiyanın tələblərinə əməl etmirlər. Quşların saxlanılmasında, yemlənməsində və daşınmasında o müasir tələblər istənilən səviyyədə həyata keçirilmir, nəticədə məhsuldarlıq azalır”.

Tahir Rzayev onu da deyib ki, bankların aqrar biznes kreditlərinin şərtlərinin sadələşdirilməsi sahibkarlığın inkişafına əhəmiyyətli dərəcədə töhfə verə bilər:

“Bu istiqamətdə müəyyən tədbirlər görülür. Dövlət mexanizmin təkmilləşdirilməsi üçün ciddi tədbirlər görüb, sərəncam və fərmanlar imzalanıb. Yaxşı haldır ki, keçən il sahibkarlara 362 milyondan çox subsidiya verilib.

Hesab edirəm ki, bu istiqamətdə banklar da öz fəaliyyətlərində müəyyən dönüş yaratmalıdırlar. Ancaq bank sisteminin öz proqramları, istiqamətləri var. Bu gün onları nəyəsə məcbur etmək yolverilməzdir, amma müəyyən hesablamalar aparılmalıdır və düşünürəm bu, həm banklar, həm də sahibkarlar üçün faydalı olar”.