BALIQ OVU-  yazdı  Coşqun Xəliloğlu 

YAZARLAR 21:05 / 06.04.2025 Baxış sayı: 1495

 

(UŞAQLAR ÜÇÜN QISA HEKAYƏ)

İstirahət günlərinin birində Muradla Akif balıq tutmağa getmək üçün lap tezdən oyandılar. Onlar söhbət edə-edə kənddən bir qədər aralıda yerləşən Baba gölünə gəlib çatdılar. Uşaqlar tilovlarını açıb qarmaqlarına qurd qoydular. Bir az keçmiş Muradın tilovunun üzgəci suda batıb-çıxmağa başladı. Birdən tilov elə sürətlə dartıldı ki az qaldı Murad əlindəki qarğı ilə birlikdə suya düşsün. Amma o, cəld qarğını var gücü ilə dartıb sudan iri bir çəki çıxardı.

Bir az keçmiş Murad daha bir balıq tutdu. Amma nədənsə Akifin tilovuna bir dənə də olsun balıq düşmürdü. O, dilxor halda yerini dəyişir, tez-tez tilovu sudan çıxarır, yenidən hirslə suya tullayırdı.

Günorta idi. Geri dönmək vaxtı çatmışdı. Uşaqlar tilovlarını yığışdırıb kəndə qayıtmaq istəyirdilər. Murad balıq yığdığı torbanı ağzı aşağı çevirdi. Düz on dənə balıq şappıltı ilə yaşıl otların üstünə düşdü. Murad beş balıq ayırıb dedi:

–Akif, götür, bunlar sənindir.

–Yox, lazım deyil, –Akif mızıldandı.

–Ovçuluqda belə qayda var, – ovçular ovlarını bərabər bölməlidirlər. Yoxsa gələn dəfə evə ovsuz qayıdarlar. Bunu mənə babam öyrədib. Axı o, ovçudir.

– Çox sağ ol, Murad, –Akif balıqları öz torbasına yığdı.

Uşaqlar deyə-gülə kəndə qayıtdılar.

Şəkilin açıqlaması yoxdur.