Əməliyyat öncəsi

Vahiməli dəhlizi

keçəndə ağır-ağır,

Allahın gözlərinə

baxırsan fağır-fağır

əməliyyat öncəsi.

Allahdan başqa hamı,

hər şey səndən aşağı.

Aparır qanadında

Son ahın son işığı

əməliyyat öncəsi.

İşıqların selində

yolçu varır, yol varır.

Ən Allahsız adam da

Allahına yalvarır

əməliyyat öncəsi.

Taxt-tacına yayxanan

qorxu xandı, paşadı.

Parıldayan bıçaqlar

Əzrailə oxşadı

əməliyyat öncəsi.

Hamı cərrah üzündən

sevgi umur, nur umur.

Yaxşı ki, bərk ağrıyan

dərk eləmir durumu

əməliyyat öncəsi.

Bir sahilsiz boşluğa

yıxılırsan adından.

Başına gələn bilir:

Dünya çıxır yadından

əməliyyat öncəsi.

Çətin sınağa gedən

uçağa dönür adam.

“Anam, hardasan?”- deyib,

Uşağa dönür adam

əməllat sonrası...

Əməliyyat sonrası

Gözlərini açmamış

Deyirsən: “Lənət xofa,

nəfəs verin bir udum!”

Gözlərini açanda:

-Salam dünya işığı!!!

-Salam, yeni mövludum!!!