PƏRİ

Ay Pəri,

Gəl bəri.

Sulayaq

Həyətdə

Gülləri.

Yer əkək,

Arx çəkək.

Nur saçsın

Bağçamız

Günəştək.

Göy otlar

Yamyaşıl,

Təm-təzə.

Çıx çölə,

Yüyürüb

Gəl bizə.

İstəsən

Çəməndən

Bir dəstə

Çiçək dər.

Tez gəl, ha...

Kəsməsin

Yolunu

Küləklər...

Ay Pəri,

Gəl bəri.

Birlikdə

Seyr edək

Al-əlvan

Gülləri.

TUNCAY EV ŞƏKLİ ÇƏKDİ

Tuncay vərəqin üstə

Rəngli ev şəkli çəkdi.

Yamyaşıl “həyət”də də

Həm ağac, həm gül “əkdi”.

Anası çox sevinib

Söylədi: - Oğlum, əhsən!

Sabah onu baxçada

Hamıya göstərərsən.

Tuncay dedi: -Aysuya

Verəcəyəm şəkli mən.

Kirayədə qalırlar,

Öyrənmişəm özündən.

Deyəcəyəm sizin də

Qoy, olsun öz eviniz.

Anamla qonaq gələk,

Şadlanıb sevinək biz...

YAZ GƏLƏNDƏ

Dağlara köç edibdir

Qışın qarı, ayazı.

Nur saçır yurdumuzun

Güllü-çiçəkli yazı.

Bağ-bağçada yasəmən,

Yamacda lalə gözəl.

“Kipriyindən” şeh daman

Qönçə “piyalə” gözəl.

Qamətini dikəldən

Xarıbülbül təzə-tər.

Nərgizin, bənövşənin

Ətri dillərdə əzbər.

Əsən meh sığal çəkir

Daşların mürgüsünə.

Şehli çəmən dönübdür

Gözəllik sərgisinə.

30.03.2021