Əzəl gündən insan nəfsə əsirdi,

Yerli-yersiz söyülən bəxt yesirdi...

Təkcə Allah bilir bu necə sirdi,

Görən niyə heç vaxt düşmür yada,-son?

Həyat eşqi həm şirinmiş, həm acı,

Kimsə deməz ölüm inci,-baş tacı!

Əgər yoxsa bir mərəzin əlacı,

Lal sızıltı, boğulan səs-səda,-son!

Mələklərlə üz-üzəymiş hər ölən,

“İnkir-minkir” yuxuyozan, sirr bilən.

Vaxtın dırnağının ucunda gələn

Qaşqabaqlı, sərt baxışlı nida,-son!

Nəfəs gedib qayıtmırsa, batır səs,

Nə təbəssüm xilaskardı, nə həvəs...

Görən niyə "qansoranlar" demir bəs,-

Salam olsun qalanlara... bu da,-son!

21.05.2025