Nə sözə-söhbətə həvəsim qalıb,

Nə də ki, könlümdə yar havası var.

Bu qədər zəhəri kimə boşaldım,

Dilimdə bir əfi mar havası var.

Öldü bu faniyə saldığım meyil,

Dolanır içimdə dərd veyil-veyil,

Fəryadım heç kimin vecinə deyil,

Çünki məmləkətdə kar havası var.

Görünmür son ucu sərt yoxuşların,

İpini çəkən yox qudurmuşların,

Yolunub qanadı qızılquşların,

Tərlan oylağında sar havası var.

Yoxdan yazmıram ki, bu şeri, yoxdan..

Xəlbirə dönübdü ürəyim oxdan,

Mən də tüpürərdim hər şeyə çoxdan,

Qoymur e, canımda ar havası var.

Xoş-naxoş kim gəldi qucaq açanıq,

Amma nə dözümük,amma nə canıq..

Yalandan günəşli Azərbaycanıq,

Hamının içində qar havası var.