Çaparaq gəlib çıxa,

çöldə hökm edə şaxta,

Meşənin ətəyində balaca bir otaqda.

Qışın oğlan çağında bir odun peçi yana,

Bir az tüstünün iyi, bir az alovun ətri

Keçə ürəyə-qana..

Qızılgül ləçəyitək sola günəşin üzü,

Soyuq göm-göy göyərdə ağarmış çölü-düzü,

Eşidilə küləyin boğuq kişnərtiləri,

dağların ətəyindən..

Sovura sərçələri tökə qar üstə dən-dən..

Qar yağa qucaq-qucaq,

qar yağa ətək-ətək,

Yağa lap hövsələylə ta gecə yarıyadək.

Qar yağa asta-asta, qar yağa narın-narın,

Uzana ağ saqqalı qocaman ağacların.

Stolun üzərində balaca bir şam yana.

O evdə, o otaqda hakim olasan ana!

Qorxusunu unudub məlun bir ömrün-yaşın,

Yanında üç-dörd nəfər könül dostun-sirdaşın,

Qovasan içindəki lilləmiş durğunluğu.

Çıxa bir az canından illərin yorğunluğu.

Vurub nəğmə deyəsən aradabir bu qışa,

Hörümçək toru basmış divarlar da qızışa..

Badə-badə eydirib könlümüzü sağa, qar,

Asta-asta vurasan, yavaş-yavaş yağa qar..

Qapını aralayıb

hərdən baxasan qara,

Lap bir az da gedəsən o qarı yara-yara..